يالشهيد ..اعطيتنا روحك بالسلط وطلعت .. يخوك ..سايق عليك الله تسامحنا .. تراك فتت طناب بيتنا وقصرنا معك .. سامحنا .. والله ما احنا متعودين ع القصور ..
والله ورب السما إنه السلطي بفدي ضيفه بروحه واولاده … السلط بيت بسبع شعاب ..وانت قبل ما تشهق اخر أنفاسك سمعت شبابها بتصيح لجماعتك وهو يقولوا : يا جماعة سايق عليكوا الله انتوا ضيوفنا والضيف بالسلط ما بنظام .. جاهمكوا بالله لا تجهدوا بلانا ..احنا بنشتبك معهم ..انتوا خليكوا بعاد .. شبابنا نشامى ..وسلاحنا وافر..
يخوك يالشهيد انت شفت بعينك حرقت شبابنا وفزعهتم وسلاحهم وعتادهم .. يخوك سامحنا ووعد .. وعد الحر دين .. والسلطية احرار .. انه ثارك ما رح يروح هدر .. يخوك لا تقول للي سبقوك من الأسود إنه السلطية قصروا معنا .. قلهم شو شفت بعينك .. قلهم فزعتهم زي فزعة ربع الهية بالكرك .. زي فزعة أهل اربد ..
قلهم حُرقتهم زي حُرقة اي أردني بس إحنا ما خليناهم يتدخلوا .. يا ابوي .. يا أبو الشهيد سامحنا .. وفك لثامك ..وارفع راسك ترى ابنك ابنا وأخونا وابن عمنا ..تراه صقر ما رضي يعيش الا بالعالي .. ابنك سبع غاص عليهم وقلبه وراه .. ابنك خاف عليك وع اولاده .. والله لو سمعت صوت رفعة قسامه .. غير تطخ من الفرح وتقول للنسوان زغرتن .. وانت يا يمه ..
يا أم العريس .. لا تقولي الولد استشهد بالسلط .. لا توجعي قلوبنا أكثر من هيك .. بدك بداله بنطلعلك كل شباب السلط معنا اكفانا.. يا يمه والله واللي اسمه الله حاولنا نبعد ابنك الشهيد عن الموقع وهو ما رضي. قال انتوا خليكوا بعاد .. واذا احتجناكوا بناديكوا .. يمه والله السلطية ما الهم ع القصور .. بس ابنك جيش بحاله .. ابنك أسد مغوار.. لو تشوفي كيف مسكته للسلاح .. لو تشوفي كيف اشر بكف إيده للنشامى واقتحم .. افتخري بيه يمه وعلي صوت الزغاريت ..
يا أخته ومرته .. يا خياتي لا تنوحن .. زغرتن للنشمي اللي رافع الراس .. هاهن وقولن ياللي بيك ينضرب المثل .. تراه اليوم مروح عليكن اخر ترويحه .. يمكن ما معه اغراض ولا خبز .. يمكن ما يفوت فاتح ايده ليسلم .. انتن استقبلنه ولا تنزلن دمعته .. خليه رافع راسه
بوسنه بوسة الجبين وودعنه خليه يفتخر بحاله .. ودخيلكن لا تغسلن فوتيكه .. ورجعنه ع السلط .. خلي ريحة عرقه المعطره بالشهامة تفوح ببلادنا .. #سامحونا_على_القصور #شهداء_الواجب
محمود حياصات
